Моќниот тајфун Дуџуан се приближува кон поширокото подрачје на Токио, а јапонските власти предупредуваат на опасност од обилни врнежи, поплави и свлечишта.
Јапонската метеоролошка агенција издаде предупредување од највисоко, петто ниво за островот Ошима во архипелагот Изу, кој се наоѓа околу 105 километри јужно од Токио. Во повеќе други области во источниот дел на Јапонија се активирани итни предупредувања од четврто ниво.
Според јапонските медиуми, повеќе од 1,6 милиони луѓе добиле наредба за евакуација.
Невремето веќе предизвикува сериозни проблеми во воздушниот сообраќај. Стотици летови се погодени, а патниците се соочуваат со откажувања, доцнења и пренасочувања.
Обилните врнежи веќе ги зафатија островите Изу и делови од јапонскиот пацифички брег. На одредени локации од саботата наваму се регистрирани повеќе од 300 милиметри дожд.
Метеоролозите предупредуваат дека ситуацијата може дополнително и брзо да се влоши со приближувањето на тајфунот кон Токио. Постои можност над централниот дел на Јапонија да се формираат долготрајни појаси со интензивни врнежи, кои значително го зголемуваат ризикот од поројни поплави и свлечишта.
Поради тајфунот за неколку часа е одложено и заминувањето на јапонската премиерка Санае Такаичи за Њујорк, каде што треба да учествува на Генералното собрание на Обединетите нации.
