Необична сцена се случила на плажа во местото Казуце, во близина на Рагуза на југот на Сицилија, кога морето почнало да исфрла запечатени пакети полни со банкноти. Според првичните проценки, во нив имало околу 700.000 евра.
Очевидци велат дека бројни капачи веднаш влегле во водата за да ги извадат пакетите кои струите ги носеле кон брегот, пред на местото да пристигнат надлежните служби.
Според информациите на италијанските медиуми, пакетите најверојатно биле фрлени од глисер кој пловел од Малта кон Сицилија. Наводно, пловилото останало без гориво и претрпело дефект, а лицата што биле на него, пред доаѓањето на крајбрежната стража, почнале да исфрлаат пакети со готовина во морето.
Набрзо на местото пристигнале полицијата, финансиската полиција и крајбрежната стража, кои успеале да ги обезбедат и запленат речиси сите пакети со пари.
Во моментот на интервенцијата, на глисерот било затекнато едно лице, додека уште три лица претходно излегле на копно. Според властите, сите четворица биле идентификувани и сослушани, а пловилото е задржано за дополнителни проверки.
Истрагата сè уште трае, а италијанските власти работат на утврдување на потеклото на парите и нивната намена. Меѓу можните верзии што се разгледуваат се перење пари, нелегален транспорт на готовина или поврзаност со организиран криминал.
Видео:
