Германија во наредните години ќе се соочи со сериозен недостиг на квалификувана работна сила, бидејќи милиони искусни работници постепено ќе заминат во пензија.
Според анализата на Центарот за компетенции за квалификувана работна сила при Институтот за германска економија, во следните 10 до 15 години околу 4,6 милиони квалификувани работници ќе го напуштат пазарот на трудот.
Од нив, повеќе од 3,6 милиони работат во сектори кои и денес се соочуваат со сериозен недостиг на кадар.
Меѓу најпогодените области е јавниот превоз. Речиси две петини од возачите на автобуси и трамваи имаат најмалку 55 години, а се очекува повеќе од 60.000 возачи да заминат во пензија до 2041 година.
Последиците веќе се чувствуваат. Во одредени германски региони се откажуваат автобуски линии поради недостиг на возачи, а експертите предупредуваат дека ситуацијата може дополнително да се влоши доколку не се привлече нов кадар.
Сличен проблем постои и во транспортниот сектор, каде што во наредните 10 до 15 години се очекува пензионирање на околу 200.000 возачи на камиони. Ова би можело да предизвика дополнителни проблеми во синџирите на снабдување и логистиката.
Под силен притисок е и градежниот сектор. Околу 41 проценти од лицата задолжени за надзор на градба веќе имаат најмалку 55 години, а повеќе од 1.200 работни места моментално остануваат непополнети.
Главната причина за ваквата состојба е демографската структура. Генерацијата на таканаречените „бејби бумери“ масовно заминува во пензија, додека бројот на млади луѓе кои влегуваат на пазарот на трудот е значително помал.
Експертите сметаат дека едно од можните решенија е постарите работници подолго да останат активни. За тоа, според нив, ќе бидат неопходни пофлексибилно работно време, подобри услови за работа, поголема грижа за здравјето на вработените и систематски пренос на знаењето од поискусните кон помладите генерации.
