Партијата Единствена Русија, која го поддржува рускиот претседател Владимир Путин, оствари убедлива победа на парламентарните избори во Русија и според прелиминарните резултати обезбеди рекордно мнозинство во Државната дума.
Според податоците на руската Централна изборна комисија, по пребројани повеќе од 95 отсто од гласовите, Единствена Русија освоила 57,83 отсто од гласовите. Тоа е значително повеќе од 49,8 отсто колку што партијата освои на парламентарните избори во 2021 година.
Според прелиминарната распределба, партијата на Путин ќе има 355 од вкупно 450 пратенички места во Државната дума. Тоа е најголем број пратеници што Единствена Русија досега го освоила и ѝ обезбедува уставно мнозинство.
Излезноста, според руската изборна комисија, надминала 59 отсто, што е повеќе од парламентарните избори во 2021 година.
Изборите беа први парламентарни избори во Русија од почетокот на руската инвазија врз Украина во 2022 година. Путин претходно ги претстави како тест за националното единство и поддршката за државната политика во услови на војна.
Сепак, изборниот процес е предмет на остри критики. Асошиејтед прес и Ројтерс наведуваат дека политичката средина била строго контролирана и дека голем број противници на војната биле исклучени од изборната трка. Партијата Јаблоко, која се противи на војната, не учествуваше на националната партиска листа.
Гласање беше организирано и во окупираните украински територии – делови од Доњецк, Луганск, Херсон и Запорожје, како и на Крим. Украина, ЕУ и повеќе западни држави соопштија дека не ги признаваат изборите одржани на украинска територија под руска контрола.
Во новиот состав на Думата се очекува да влезат и десетици ветерани од војната во Украина. Според Единствена Русија, 49 ветерани се очекува да станат пратеници од редовите на партијата.
