На вонреден состанок на Советот за безбедност на Обединетите нации, амбасадорката на САД во ОН, Дороти Шеј, ја бранеше последната воена акција против Иран, оценувајќи ја како „неопходна и долго одложувана реакција“. Според неа, дошло време Америка да дејствува решително за да ги заштити своите сојузници, граѓани и интереси.
Шеј ја обвини иранската влада дека речиси пет децении го поттикнува уништувањето на Америка и Израел, создавајќи постојана закана за меѓународниот мир. Таа го повика Советот за безбедност да ја осуди иранската политика, особено напорите за развој на нуклеарно оружје и таргетирањето на американски цели.
„Време е Иран да се повлече од патеката на конфронтација и да избере дипломатија со добра волја, не само за сопствениот народ, туку и за регионот и светот“, изјави Шеј. Таа нагласи дека одржувањето на глобалната безбедност е невозможно додека постои режим кој отворено повикува на уништување на други држави.
Оваа изјава доаѓа во момент кога тензиите на Блискиот Исток достигнуваат нов врв, а светот внимателно следи дали ова ќе биде точка на пресврт или почеток на нешто уште поголемо.
