Австралиската полиција заплени 2,7 тони кокаин со проценета вредност од околу 500 милиони евра, во операција што властите ја опишуваат како најголема од ваков вид во историјата на земјата. Дрогата била откриена во западниот дел на Сиднеј, скриена во специјално изработени тајни прегради во транспортни контејнери.
Според австралиските власти, кокаинот бил сокриен под двојни подови во три контејнери на имот во Лондондери. Во акцијата биле уапсени двајца мажи на возраст од 21 и 25 години, кои, според полицијата, се обиделе да избегаат при интервенцијата.
Тие се обвинети за поседување и увоз на големо количество наркотична супстанција, а доколку бидат прогласени за виновни, им се заканува доживотен затвор.
Истрагата покажала дека дрогата била прошверцувана во Австралија преку местото Миџ Поинт во државата Квинсленд. Акцијата е дел од пошироката „Операција Минцјан“, која започнала во мај годинава откако 40 килограми кокаин биле пронајдени како пловат во морето во близина на рампа за чамци.
Во рамките на истрагата претходно биле уапсени уште шест лица во Квинсленд и Нов Јужен Велс, додека на Соломонските Острови бил задржан брод за кој постои сомневање дека служел како логистичка поддршка за шверцерската мрежа.
И покрај строгите закони, Австралија останува една од најпрофитабилните дестинации за трговија со кокаин, каде цената на еден грам достигнува околу 300 австралиски долари. Според извештаите на Обединетите нации, Австралија и Нов Зеланд имаат меѓу највисоките стапки на употреба на кокаин во светот.
