Руските сили во изминатите 24 часа извршиле серија масовни воздушни напади врз повеќе градови во Украина, при што, според украинските власти, загинале најмалку седум лица, а повеќе од 120 биле повредени.
Нови напади биле регистрирани и во раните утрински часови во петокот, 11 септември, кога повторно бил погоден Киев. Во Дњепровскиот округ била погодена деветкатна станбена зграда, каде што избувнал пожар, а најмалку две лица биле повредени.
Украинското воено воздухопловство претходно предупредило дека кон главниот град се движат руски беспилотни летала на млазен погон. Итните служби веднаш биле испратени на терен.
Најголем број жртви во претходниот бран напади биле регистрирани во Дњепропетровската област. Според локалните власти, во нападите врз пет окрузи загинале седум лица, а 76 биле повредени.
Особено тешка била состојбата во Павлоград, каде што била погодена прометна трговска зона. Таму, според последните информации наведени во извештајот, загинале пет лица, а 67 биле повредени.
Во Дњепар загинале уште двајца цивили, додека најмалку пет лица биле ранети. Локалните власти соопштиле дека во регионот биле извршени повеќе од 30 напади со наведувани авионски бомби, беспилотни летала и артилерија.
Напади биле регистрирани и во Краматорск, Суми, Запорожје и Одеса. Во Краматорск, според украинските информации, 27 лица биле повредени, меѓу кои и бебе, а биле оштетени станбени објекти, училиште, здравствена установа и друга инфраструктура.
Во Суми биле повредени 11 лица, меѓу кои три деца, по напади врз станбени области и трговски центар.
Украинскиот претседател Володимир Зеленски ги осуди нападите и порача дека Киев продолжува да работи со меѓународните партнери на зајакнување на одбраната на земјата.
Спасувачките екипи продолжиле со расчистување на урнатините и проценка на штетата во погодените области.
