Извршниот директор на УФЦ, Дана Вајт, јасно покажа дека би сакал да го види непоразениот Усман Нурмагомедов во најголемата светска ММА организација. На прес-конференцијата по настанот УФЦ Fight Night 283 во Белград, тој без двоумење одговори потврдно кога беше прашан дали е заинтересиран да го ангажира Дагестанецот.
Неговата реакција привлече големо внимание, а дополнително ги поттикна шпекулациите откако на социјалните мрежи го објави видеото од моментот со насмеан емотикон.
Усман Нурмагомедов во меѓувреме ја заврши последната борба од актуелниот договор со ПФЛ. На настанот во Њујорк убедливо го нокаутира Арчи Колган и ја продолжи неверојатната серија на 22 победи без ниту еден пораз.
По триумфот, самиот борец порача дека неговата иднина е отворена.
„Ќе видиме што ќе се случи. Ова беше мојата последна борба според договорот“, изјави Нурмагомедов, додавајќи дека ќе биде интересно да се види која организација ќе покаже најголема желба да го ангажира.
Многумина во ММА светот го сметаат за еден од најдобрите борци надвор од УФЦ. Тој ја освои титулата во лесна категорија во Белатор во 2022 година, успешно ја бранеше неколкупати, а по спојувањето на Белатор и ПФЛ стигна и до шампионскиот појас во новата организација.
Усман е помладиот брат на Умар Нурмагомедов, кој настапува во УФЦ, како и братучед на легендарниот Хабиб Нурмагомедов. Доколку двете страни постигнат договор, лесната категорија во УФЦ би можела да добие уште едно големо име од славното дагестанско семејство.
