Ракометарите на Охрид втора година по ред го освоија традиционалниот Струшки ракометен турнир, откако во драматичното финале го совладаа Вардар со минимални 31-30.
Пресметката на двете македонски екипи понуди неизвесност практично до последната секунда. Охриѓани подобро го отворија натпреварот и во најголем дел од првото полувреме ја контролираа играта и резултатот. На паузата заминаа со предност од два гола – 16-14.
Вардар не се откажа. „Црвено-црните“ во продолжението ја засилија одбраната, успеаја да ја стопат негативата и во еден момент да го преземат водството.
Сепак, Охрид остана присебен кога беше најпотребно и во финишот повторно ја презеде контролата. При резултат 31-28 се чинеше дека победникот е решен, но Вардар со два последователни гола стигна до 31-30 и ја врати драмата.
По промашувањето на Талески, вардарци добија уште две секунди за последен обид и можност за израмнување, но времето беше прекратко за сензационален камбек.
Охрид успеа да се одбрани и со конечни 31-30 да го подигне пехарот, со што го повтори успехот од минатата година и го задржа тронот на турнирот во Струга.
Во борбата за третото место, Прилеп беше подобар од домаќинот Струга во уште една неизвесна пресметка која заврши со 30-29.
