Случајот со расфрлан отров во скопската населба Кисела Вода повторно го актуализира долготрајниот и нерешен проблем со уличните кучиња. Додека дел од граѓаните ја гледаат ваквата постапка како последица на страв и очај поради инцидентите со агресивни глутници, други предупредуваат дека труењето претставува сериозна опасност за јавната безбедност. Исто така, сè погласни се барањата за системско и институционално решение наместо индивидуални и ризични акции на терен.
Случајот на расфрлан отров во близина на раскрсницата кај „Срцето“ и Технички преглед во Кисела Вода отвори дилема која со години се провлекува во јавноста: дали труењето може да се смета за „решение“ за проблемот со агресивните улични кучиња или станува збор за опасна и недозволива практика што создава нови ризици, особено за децата.
Според објави на социјалните мрежи, засега се пријавени најмалку две отруени кучиња, но граѓаните стравуваат дека бројката може да биде поголема. Глетките од теренот се опишуваат како вознемирувачки, а реакциите во јавноста се остро поделени.
Еден дел од граѓаните ја оправдува ваквата постапка како резултат на долгогодишен нерешен проблем и недоволна реакција од институциите. Посочуваат дека имало бројни пријави за агресивни глутници и напади, но без конкретна акција.
Од друга страна, многумина остро го осудуваат труењето, нагласувајќи дека расфрлањето отров на јавни површини претставува сериозен ризик не само за уличните кучиња, туку и за домашните миленици, птиците и најмногу за децата кои можат случајно да дојдат во контакт со отровот.
Дополнително, граѓаните предупредуваат и на психолошкиот ефект од ваквите сцени, кои предизвикуваат стрес и вознемиреност кај луѓето, особено кај најмладите.
Во дел од реакциите се поставува и прашањето за тоа како се утврдува дали едно куче е опасно, како и кој ја следи ситуацијата на терен. Се нагласува дека проблемот бара системско решение, а не стихијни и опасни постапки.
И покрај различните ставови, преовладува мислењето дека труењето е незаконско и претставува кривично дело кое мора да биде санкционирано. Граѓаните бараат одговорност, а според нив, веќе се поднесени пријави и се проверуваат снимки од надзорни камери.
Случајот повторно ја наметнува потребата од итен институционален одговор. Експертите предупредуваат дека решението не лежи во индивидуални акции, туку во долгорочни мерки како стерилизација, вакцинација, контрола на сопствеништвото и поефикасно делување на надлежните служби.
Во меѓувреме, се подготвуваат измени на Законот за заштита и благосостојба на животните, со кои се предвидуваат казни до 5.000 евра за сурово однесување и мачење животни, како и до 400 евра за несовесно чување на домашни миленици. Целта е воспоставување поефикасен систем што ќе го намали бројот на бездомни кучиња преку спречување на нивно напуштање и неконтролирано размножување.
