Грејната сезона во Скопје започна два дена пред официјалниот термин, но веднаш се појавија проблеми со испораката на топлинска енергија. Дел од потрошувачите останаа без парно поради дефекти на дистрибутивната мрежа, а од ЕСМ информираат дека нивните екипи се на терен и работат на постепено нормализирање на снабдувањето.
Според информациите од ЕСМ Дистрибуција на топлина, проблемите настанале поради зголемени загуби на вода во системот, што предизвикало прекини во испораката кај дел од корисниците.
Испораката на топлинска енергија веќе е нормализирана кај најголемиот дел од потрошувачите во Центар и во Старата скопска чаршија. Сепак, на неколку локации сè уште има дефекти поради кои објектите остануваат без греење.
Меѓу објектите каде што сè уште нема парно се полициската станица во Пролет, Конзерваторскиот центар, Музејот на Северна Македонија и основното училиште „Јашар Беј Шкупи“.
Привремени прекини биле регистрирани и кај дел од потрошувачите во Кисела Вода, Аеродром и Автокоманда.
Од ЕСМ посочуваат дека екипите интензивно работат на отстранување на дефектите и на целосно нормализирање на испораката на топлинска енергија.
Немате парно? Еве каде можете да пријавите дефект
Потрошувачите кои останале без греење или сакаат да пријават проблем со испораката на топлинска енергија можат да се обратат до Центарот за грижа на потрошувачи на ЕСМ Снабдување на следните телефонски броеви:
- 02 3076 200
- 075 400 100
За корисниците на системот на ЕСМ Енергетика достапни се и следните броеви за контакт:
- 02 3104 816
- 02 3104 872
Грејната сезона започна пред официјалниот датум
Греењето во Скопје годинава започна на 13 октомври, иако официјалниот почеток на грејната сезона е предвиден за 15 октомври. Одлуката за порано активирање на системот била донесена поради падот на температурите.
Според важечките правила, испораката на топлинска енергија може да започне и пред официјалниот датум доколку прогнозата покажува дека средната дневна температура ќе биде 12 степени Целзиусови или пониска.
И покрај пораното пуштање на парното, дел од скопските потрошувачи се соочија со прекини уште на самиот почеток на сезоната, а целосното нормализирање на снабдувањето зависи од санирањето на преостанатите дефекти.
