Старечката далековидост – проблем со кој се соочуваат речиси сите по 40-тата година – можеби наскоро ќе стане минато благодарение на револуционерни капки за очи. Истражување претставено на Конгресот на Европското здружение на хирурзи за катаракта и рефрактивна хирургија откри дека повеќето пациенти по користење на овие капки можеле да читаат и до три линии повеќе на табелата за тестирање на видот. Ефектот траел и до две години.
Капките се базирани на комбинација од пилокарпин, кој ја стеснува зеницата и го зајакнува фокусот, и диклофенак, кој го намалува воспалението и непријатноста. Пациентите ги користеле двапати дневно, а резултатите биле неверојатни – брзо и трајно подобрување на видот на блиско растојание.
Најимпресивно е што 99% од испитаниците со најниска концентрација на лекот успеале да прочитаат повеќе линии без очила, а голем дел од нив го задржале овој ефект и по една година. Научниците нагласуваат дека не се забележани сериозни несакани ефекти.
Доколку капките станат достапни на пазарот, тие би можеле да ја заменат потребата од очила за читање и да понудат едноставно, неинвазивно и ефективно решение за милиони луѓе ширум светот.
