Нуклеарниот отпад, кој со децении се смета за опасен товар, би можел да стане клучно гориво за идните енергетски потреби. Истражувачите во Националната лабораторија во Лос Аламос развиваат систем што од радиоактивниот отпад создава тритиум – редок изотоп на водород, кој е основно гориво за нуклеарната фузија.
Физичарот Теренс Тарновски ги претставил резултатите на есенскиот состанок на Американското хемиско друштво, откривајќи дека ваквите реактори би можеле да обезбедат стабилни количини на тритиум и да ја направат фузијата поевтина и побезбедна.
Според неговите симулации, еден ваков реактор со капацитет од 1 гигават би можел да снабдува 800.000 домаќинства и годишно да произведува исто количество тритиум колку што сега произведуваат сите реактори во Канада заедно.
Овој пристап не само што нуди огромен енергетски потенцијал, туку и решение за складирањето на нуклеарниот отпад, кој денес претставува голем еколошки ризик. Тарновски нагласува дека енергетските транзиции се скапи и дека секоја можност за поевтино решение е чекор кон иднината.
Откритието отвора врата за револуција во енергетиката – користење на најопасниот отпад како извор на најчистата енергија.
