Климатските научници проценуваат дека поради екстремните жештини што ги носи супер Ел Нињо, во наредните шест месеци би можеле да умрат повеќе од 450.000 луѓе, пишува „Гардијан“. Најпогодени земји, според тие наводи, ќе бидат Нигерија, Индонезија, Судан, Индија и Бразил.
И Соединетите Држави се наоѓаат меѓу 20-те најзагрозени нации со предвидени 3.500 дополнителни смртни случаи, додека под силно влијание на супер Ел Нињо се и регионот Сахел во Африка и Југоисточна Азија.
Голем број жртви се предвидува поради сушите, шумските пожари и поплавите кои редовно го следат Ел Нињо.
Одреден и точен период
Проценката за смртноста се однесува на периодот од септември до февруари 2027 година, до кога сегаат моменталните температурни прогнози. Сепак, научниците сметаат дека зголемената стапка на смртност предизвикана од жештините ќе продолжи сè до јуни или јули 2027 година.
Истражувачите истакнуваат дека проекциите прецизно покажуваат каде е потребно да се воведат заштитни мерки за да се спасат животи, а тие акции вклучуваат подобра прогноза на топлинските бранови, отворање центри за разладување, зголемување на бројот на персоналот во медицинските установи и заштита на работниците на отворено.
„Неодговорно е да се молчи“
Професорот Мајкл Гринстон, соосновач на лабораторијата за клима на Универзитетот во Чикаго и еден од авторите на извештајот, изјави дека, со оглед на итноста на ситуацијата, би било неодговорно да се молчи за тоа.
Научниците истакнуваат дека овој Ел Нињо воедно е и „разгледница од иднината“ бидејќи ја покачува температурата на ниво кое поради климатската криза се предвидуваше дури за 20 години. Коавторот на извештајот, Тама Карлтон од Универзитетот Беркли, истакнува дека мора да се преземат чекори веднаш за да се осмислат, применат и проценат алатките што ќе спасуваат животи во годините што доаѓаат.
Алармантни последици
Професорката Фредерике Ото од Империјал колеџот во Лондон изјави дека моменталниот Ел Нињо претставува голема прераспределба на енергијата во климатскиот систем и е опасен бидејќи се одвива покрај значително потопол климатски систем на кој влијаел човекот.
„Поради тоа, на многу места ширум светот ќе доживееме никогаш порано видени екстремни жештини, со сите последици по здравјето, безбедноста на храната и снабдувањето со вода“, предупреди таа.
Ел Нињо ќе влијае и врз залихите на храна. Светската програма за храна претходно предупреди дека неговите последици би можеле да доведат до акутна глад кај околу 50 милиони луѓе и да предизвикаат раст на цените.
Феноменот Ел Нињо
Ел Нињо кој во моментов ја загрева планетата ги надмина досега највисоките забележани температури за тој феномен и тоа неколку месеци пред очекуваниот пик. Жештината е толку поголема од сите претходни појави што научниците ја опишаа како „запањувачка“ и на „ниво на Годзила“.
Станува збор за природен климатски настан, но глобалното затоплување може дополнително да ги засили неговите ефекти.
