Американската вселенска агенција НАСА објави необична аудио-снимка која открива како би звучела црна дупка во вселената, а морничавите тонови што се слушаат веднаш предизвикаа огромно внимание на интернет.
Станува збор за звук добиен од галактичкото јато Персеј, кое се наоѓа на околу 250 милиони светлосни години од Земјата. Снимката за кратко време стана вирална, а голем број корисници коментираат дека звуците делуваат застрашувачки, вознемирувачки и како да се преземени од научнофантастичен хорор филм.
Иако долго време се сметало дека вселената е целосно тивка, научниците објаснуваат дека во одредени делови богати со гас, звучните бранови можат да се движат низ просторот.
За создавање на снимката, научниците користеле податоци од вселенската опсерваторија „Чандра“, со чија помош биле детектирани бранови на притисок што се шират околу црната дупка.
Овие бранови првично биле на толку ниска фреквенција што човечкото уво не можело да ги слушне – дури 57 октави под средното Ц.
За звукот да стане слушлив, астрономите ја зголемиле фреквенцијата за 57 и 58 октави. Преку процес познат како сонификација, научните податоци биле претворени во аудио-запис што денес може да се слушне.
Резултатот е длабоко и постојано зуење кое кај многумина предизвикува морници.
Покрај аудио-снимката, НАСА објави и визуелизација која ги прикажува брановите на притисок што се шират од центарот на космичкиот феномен.
На социјалните мрежи бројни корисници пишуваат дека звукот е истовремено фасцинантен и вознемирувачки, а многумина посочуваат дека најстрашниот дел е фактот што не станува збор за измислен ефект, туку за вистински астрономски податоци добиени од длабоката вселена.
