Денеска официјално започнува судскиот процес за катастрофалниот пожар во кочанскиот ноќен клуб „Пулс“, каде на 16 март 2025 година животот го загубија 63 млади лица. Случајот ја потресе целата држава, а судењето во Идризово ќе ја открие сериозната одговорност на сите инволвирани страни, објави 4NEWS.mk.
Обвинителниот акт, поднесен од ОЈО Кочани, детално ја опишува системската негрижа, свесните пропусти и корупцијата кои довеле до трагедијата. Вкупно 34 физички лица и 3 правни субјекти се товарат за „Тешки дела против општата сигурност“, а обвинението открива серија скандалозни пропусти на повеќе нивоа:
- Сопствениците и менаџерите – клубот бил реконструиран нелегално, со лесно запаливи материјали, само еден излез и без функционални хидранти, што го направило објектот смртоносен во случај на пожар.
- Обезбедувањето – неоснована работа на црно, без контрола на посетителите и дозволување внес на пиротехнички средства и малолетници.
- Општина Кочани – три генерации градоначалници и инспектори биле свесни за нелегалното работење на клубот, но не презеле никакви мерки за негово затворање.
- Државни институции – пропусти од Дирекцијата за заштита и спасување, Министерството за економија и Државниот пазарен инспекторат, вклучувајќи незаконско издавање лиценци и фалсификувани документи.
- Корупција – службеник од Министерството за економија се товари за примање мито и фалсификување документи за нелегална лиценца на клубот, со сума од 226.000 денари.
Судскиот процес се очекува да ја расветли целата одговорност, од сопствениците и менаџерите, па сè до високите државни функционери, и да покаже како системските пропусти и корупцијата можат да доведат до невидена трагедија.
