Во текот на ноќните и раните утрински часови, силните врнежи кои го зафатија западниот и југозападниот дел од земјата предизвикаа серија свлечишта и одрони на повеќе критични делници. На итниот број 112 пристигнале повеќе пријави за земјишни одрони што го блокирале или загрозиле сообраќајот, особено на релациите Дебар – Струга кај местото Џепчиште и на патниот правец Кичево – Охрид, кај местото Извор.
Според Центарот за управување со кризи, веднаш по добиените пријави Оперативниот центар стапил во контакт со дежурните служби на „Македонија пат“. Екипите веднаш излегле на терен и почнале со расчистување на свлечиштата кои претставувале директна опасност за возачите.
Надлежните истакнуваат дека работите продолжуваат додека теренот целосно не се обезбеди и не се нормализира сообраќајот на погодените делници.
