Грчки лекари и аптекари нанеле штета од околу 12 милиони евра на државниот здравствен фонд, користејќи незаконско препишување на рецепти, јавија грчките медиуми. Вкупно 32 лекари и 62 аптеки се опфатени во случајот, а изречени се парични казни од 98.500 евра.
Контролите покажале дека неколку десетици здравствени работници намерно манипулирале со рецепти за лекови, злоупотребувајќи ја довербата на државниот систем. На состанокот на Националната организација за обезбедување здравствени услуги (ЕОПИИ) било најавено дека следуваат нови проверки на десет лекари и 80 аптеки, вклучени во истраги на финансиската полиција.
Минатата година, грчката полиција веќе разби две криминални групи и уапси 16 лица, меѓу кои лекари и фармацевти, за измами во висина од 3,5 милиони евра.
Случајот го открива системскиот проблем со злоупотреба на рецепти и ја потврдува потребата од построги контроли во здравствениот сектор.
