Германската полиција се соочува со мистериозен и шокантен случај кој ја потресе земјата. Во текот на мртвата ноќ од недела до понеделник, на автопатот А45 во близина на Зиген беа пронајдени отсечени женски раце, а деновиве полицијата објави дека пронашла и бебето на жената чиј дел од телото бил откриен, оставено пред манастир во Хесен.
Рацете беа идентификувани како дел од 32-годишна жена од Еритреја, која престојувала во центар за азиланти. Сепак, судбината на жената сè уште не е целосно разјаснета. Бебето, старо само три месеци, било пронајдено напуштено пред манастир, покриено со волнено ќебе. Според медиумите, монах ја пронашол количката околу 18:30 часот во недела, а детето подоцна почнало да плаче.
Според извештаите, во количката имало две белешки – едната со името и датумот на раѓање на бебето, а другата со името на мајката. Полицијата официјално не ги потврди овие детали. Бебето е ставено под официјално старателство, а истрагата за тоа зошто било оставено таму продолжува.
Иако жената е идентификувана со помош на отпечатоци од прсти и е регистрирана заедно со бебето во центарот за азиланти во Бон, начинот на кој нејзините раце се нашле на автопатот останува непознат. Нема информации за таткото на детето, а полицијата спроведува обемни пребарувања за 32-годишната жена.
„Обемните пребарувања досега не дале резултати, а околностите на злосторството остануваат нејасни“, соопшти полицијата, додавајќи дека се надеваат на информации од јавноста. Сведоците можат да се јават на телефон 02331 – 986 2066.
