Министерството за внатрешни работи во текот на август спровело засилени контроли на возачите на електрични тротинети низ целата држава, при што биле констатирани вкупно 606 прекршоци.
Најмногу санкции – 162, биле изречени поради неносење рефлектирачки елек при управување со електричен тротинет во ноќни услови. Уште 134 прекршоци биле регистрирани поради некористење велосипедска или пешачка патека, а 59 поради неносење заштитен шлем.
Полицијата санкционирала и 45 случаи во кои на електричен тротинет се превезувале две лица, како и 20 случаи во кои тротинетите биле управувани од малолетници.
Во рамки на контролите биле одземени и 18 електрични тротинети во времетраење од 30 дена.
Најголем број прекршоци биле регистрирани на подрачјето на СВР Битола – 236. Следуваат СВР Скопје со 97, СВР Струмица со 82, СВР Охрид со 57, СВР Тетово со 27, СВР Велес со 18, СВР Штип со 13 и СВР Куманово со седум прекршоци. Дополнителни 69 биле регистрирани од Мобилната единица за безбедност во сообраќајот.
При акциските контроли полицијата констатирала и 3.665 други сообраќајни прекршоци.
Од МВР најавуваат дека засилените контроли ќе продолжат со цел поголема безбедност на сите учесници во сообраќајот и почитување на сообраќајните правила.
