Полицијата во Тетово истражува инцидент во кој две девојки скокнале од такси возило во движење, откако, според нивната пријава, возачот не ги однел до договорената дестинација и ја сменил рутата.
Случајот бил пријавен на 4 август во Полициската станица Теарце. Според информациите од СВР Тетово, 20-годишна девојка од селото Пршовце и нејзината 16-годишна другарка пријавиле дека за време на возењето таксистот се однесувал несоодветно и одбивал да го запре возилото.
Двете, според пријавата, успеале да излезат од таксито додека тоа било во движење, по што побарале помош.
Со возачот е извршен информативен разговор, а за случајот се известени јавен обвинител и Центарот за социјални работи во Тетово. Надлежните преземаат мерки за целосно расчистување на настанот.
