По неодамнешниот инцидент во кој три млади лица беа повлечени од силниот воден тек на реката Треска, повторно се отвори прашањето за опасностите кои ги носат брзите и студени реки, особено во периоди кога нивото на водата може нагло да се промени.
Пред два дена беше објавено дека двајца 15-годишници и еден 18-годишник биле однесени од струјата на Треска, откако водостојот на реката ненадејно се зголемил поради зголемен испуст од браната „Матка“ за производство на електрична енергија.
За среќа, тројцата млади биле успешно спасени, но случајот повторно го привлече вниманието кон ризиците при капење и престој покрај оваа река.
На социјалната мрежа „Х“, еден корисник сподели предупредување и совети за сите кои летните денови ги поминуваат покрај Треска, посочувајќи дека реката може да биде непредвидлива дури и кога на прв поглед изгледа безопасно.
„Не си играјте на Треска и секогаш следете го нивото на водата. Треска е ладна и опасна. Тие што не ја познаваат реката не треба да се опуштаат“, напиша корисникот под псевдоним „Џон Блек“.
Тој советува капачите внимателно да го следат движењето на водата и да бидат свесни дека условите во реката можат брзо да се променат.
Според неговата објава, особено внимание треба да се посвети на деловите каде што Треска се спојува со Вардар, бидејќи станува збор за место со силни струења и променливи услови.
„Берете памет деца. Учете од постарите“, порача тој, апелирајќи младите да не ги потценуваат природните опасности.
Реките како Треска можат да бидат привлечни места за разладување во летниот период, но студената вода, силните струи и ненадејните промени во водостојот претставуваат сериозен ризик, особено за оние кои не го познаваат теренот.
По инцидентот, апелите на граѓаните се насочени кон поголема внимателност, следење на предупредувањата и избегнување ризични ситуации покрај водните текови.
