Свети Мамант бил роден во Пафлагонија, од благочестиви христијански родители – Теодот и Руфина. Бидејќи ја исповедале христијанската вера, тие биле фрлени во затвор, каде што таткото прв ја предал душата на Бога. Мајката го родила Мамант во затворот и веднаш потоа и самата починала. Младенецот останал сам, меѓу мртвите тела на своите родители.
Но, Божјата Промисла не го оставила – ангел Божји се јавил на благородна вдовица по име Ама и ѝ наредил да оди во затворот и да го земе детето. Таа добила дозвола од градските власти, ги закопала родителите и го однела малечкиот Мамант во својот дом.
Интересно е што тој не прозборел сè до петтата година, а првиот збор што го изговорил бил „мама“ – по што и го добил името Мамант.
Како дете бил бистар и храбар, а воспитан во длабока христијанска вера. На училиште отворено ја исповедал својата вера, без страв од осуда. Во времето на цар Аврелијан, кога гонењето на христијаните било особено сурово, и Мамант бил уапсен и изведен пред царот – иако имал само 15 години.
Царот го молел барем формално да се откаже од Христа, но младиот Мамант одговорил: „Ниту во срцето, ниту со устата нема да се одречам од мојот Бог и Цар Исус Христос.“
По овие зборови, следеле страшни маки: бил тепан, горен со свеќи и најпосле фрлен во море – но ангел Божји го спасил и го однел на висока гора, каде што Мамант живеел како отшелник, во пост и молитва. Дивите ѕверови му се покорувале и живеел меѓу нив како со браќа.
Повторно бил пронајден и вратен на маки. Ги поднел сите страдања – огнот, дивите ѕверови – но најпосле бил убиен со трозабец од идолски жрец.
Својата света душа Му ја предал на Бога, останувајќи Му верен до крај. Моштите на Свети Мамант станале извор на многу исцелувања и чуда меѓу верниците.
