Бигорскиот манастир предупредува дека Halloween, или Ноќта на вештерките, станува сѐ попопуларен, но има пагански корени и не носи позитивна порака. Празникот потекнува од келтските обичаи, кога се одбележувал преминот од светлиот во темниот период на годината, со богот Самахин како господар на смртта. Тогаш се верувало дека душите на мртвите ги посетуваат домовите на живите и се барало нивно „смирение“ преку приноси.
Со доаѓањето на христијанството, на овие обичаи им се спротивставил празникот „Ден на сите Светии“, кој има сосема различна смисла. Денес, пак, Halloween се празнува со маски на вештерки, вампири и ѓаволи, што го претвора во култ на смртта и нечистите сили, а честопати се поврзува со криминал и вандализам на Запад.
Манастирот ги повикува родителите да се спротивстават на празнувањето и да го заштитат детето од комерцијализацијата и демонизацијата на детската свест. Современото прославување на Halloween е „бизнис проект“ каде децата трошат пари на маски и сл., а најголемиот „производ“ е нивната психа. Образованието, според манастирот, треба да го воспитува детето во духот на конструктивната религиозна традиција, а не да учествува во празнувања што ги нарушуваат културните и моралните вредности.
