Турскиот суд донесе историска пресуда — единаесет лица се осудени на доживотен затвор поради пожарот што во јануари годинава го зафати хотелот „Гранд Картал“ во познатиот ски-центар во покраината Болу. Во катастрофата загинаа 78 лица, меѓу кои и 43 деца, додека 137 гости беа повредени.
Меѓу осудените се наоѓа и сопственикот на хотелот, кој заедно со уште десетмина обвинети беше прогласен за виновен за тешко кршење на безбедносните протоколи и предизвикување смрт поради немарност. Вкупно 32 лица беа опфатени со обвинението, меѓу кои и членови на управата, вработени во хотелот, локални функционери и пожарникари.
Несреќата се случила во период на училишен распуст, кога бројни семејства од Истанбул и Анкара престојувале во комплексот. Истражните органи утврдија дека пожарот започнал во кујната и се проширил со огромна брзина поради дрвената фасада и недоволната противпожарна заштита.
Трагедијата предизвика бурни реакции низ целата земја, а јавноста побара строги санкции и системски промени во туризмот. Властите најавија нови прописи за безбедност во туристичките објекти, со цел вакви настани никогаш повеќе да не се повторат.
