Големиот христијански празник Богојавление – Водици традиционално ќе биде одбележан во сите градови низ Македонија, а најсвечено и со најголемо учество на верниците, како секоја година, во Охрид.
Градот веќе е во празнична атмосфера: пристаништето е украсено, поставени се верски знамиња, а туристичките капацитети се речиси исполнети со домашни и странски посетители кои сакаат да присуствуваат на положувањето на Светиот крст во водите на Охридското Езеро.
Програма на централните настани во Охрид:
- Утро, 19 јануари – света празнична литургија во сите парохиски цркви.
- Литии – трите традиционални литии од црквите „Св. Богородица – Каменско“, „Св. Георги – Горна Влашка Мала“ и „Св. Никола – Геракомија“ се упатуваат кон градското пристаниште.
- 10:00 часот – положување на Светиот крст во водите на Охридското Езеро, предводено од Митрополитот Дебарско-кичевски г. Георги.
- 12:00 часот – концерт на Елена Андоноска и Елена Велевска на плоштадот „Св. Климент Охридски“; верниците и посетителите ќе можат да се почестат со традиционална топла ракија.
- 12:00 часот, месноста Сараиште – извршување на бесплатно групно крштевање за сите заинтересирани.
Оваа година, околу 300 пријавени капачи ќе учествуваат во фрлањето на светиот крст, продолжувајќи ја вековната традиција која симболизира чистење на душата и телото и донесување благослов за следната година.
