Директор на супермаркет во украинскиот град Кривји Рог е приведен под сомнение за злоупотреба на службената должност, откако објектот продолжил да работи и покрај активната воздушна тревога.
Украинскиот министер за внатрешни работи Иван Виговски соопшти дека полицијата и обвинителството започнале истрага за постапувањето на одговорните лица во трговскиот и забавниот комплекс погоден во нападот.
Според Виговски, супермаркетот не бил затворен навреме и покрај предупредувањата од локалните власти дека објектите треба да престанат со работа за време на воздушни напади. По нападот, во објектот биле пронајдени голем број загинати лица.
Во истрагата ќе се утврдува дали вработените и посетителите биле навремено предупредени, дали евакуацијата била спроведена како што треба и дали засолништето било достапно. Ќе се проверуваат и наводите дека влезот во засолништето можеби бил блокиран.
Надлежните ќе ги испитуваат и постапките на останатите одговорни лица, како и правилата според кои компаниите треба да постапуваат при активирање на воздушна тревога.
Според украинските власти, во рускиот напад врз Кривји Рог загинале 16 лица, додека околу 130 биле повредени. Од моментот на активирањето на воздушната тревога до првиот напад со беспилотни летала, според Виговски, поминале околу 20 минути.
Украинскиот министер упати апел до раководителите на компаниите и институциите, особено во областите блиску до фронтот, стриктно да ги почитуваат сигналите за воздушна опасност и навреме да ги преземаат мерките за заштита на граѓаните.
