Зголемен број деца во изминатите денови побарале медицинска помош во Клиничката болница во Тетово, каде што за само 48 часа биле прегледани дури 139 мали пациенти.
Од Одделот за педијатрија информираат дека 12 деца биле задржани на болничко лекување, додека останатите по прегледот биле пуштени на домашно лекување со соодветна терапија.
Според лекарите, кај најголем дел од децата се појавувале симптоми како висока телесна температура, повраќање и дијареја.
Педијатарот д-р Иса Османи оценува дека во најголем број случаи станува збор за вирусни инфекции кои се карактеристични за летниот период. Сепак, поради возраста на пациентите, лекарите особено предупредуваат на опасноста од дехидрација кога детето има повраќање или дијареја.
Еден од факторите што може да придонесе за зголемување на бројот на вакви инфекции се високите летни температури. Дополнителен ризик претставува и неправилното подготвување или чување на храната.
Особено внимание треба да посветат родителите на малите деца кои користат адаптирано млеко, бидејќи неговата подготовка и чување бараат строга хигиена и правилно ракување.
Лекарите посочуваат и на можноста инфекциите да се шират преку контакт меѓу болно и здраво дете, особено во периоди кога има поголема циркулација на вируси.
НАЈВАЖНО Е ДА НЕ ДОЈДЕ ДО ДЕХИДРАЦИЈА
Кај дете со дијареја или повраќање, еден од најголемите ризици е губењето на течности и електролити. Затоа, родителите треба внимателно да следат дали детето внесува доволно течности.
Д-р Османи советува при појава на овие симптоми да се обезбеди соодветен внес на течности и електролити, со цел да се надоместат загубите и да се намали ризикот од дехидрација.
Покрај хидратацијата, лекарите препорачуваат зголемено внимание на хигиената при подготовката на храната, правилно чување на намирниците и одржување на чисти раце и површини.
Исто така, доколку детето има симптоми на инфекција, треба да се избегнува негов контакт со други деца за да се намали можноста за понатамошно ширење.
Иако најголемиот дел од прегледаните деца биле пуштени на домашно лекување, фактот дека 139 деца побарале медицинска помош за само два дена е причина родителите во овој период да бидат особено внимателни со хидратацијата, храната и хигиената кај најмладите.
