Првиот посериозен пожар на отворен простор оваа сезона е регистриран денеска во околината на Штип.
Според првичните информации, огнот зафатил ридски подрачја во непосредна близина на градот, при што гори сува трева и ниска вегетација.
На терен интервенираат противпожарни екипи кои се обидуваат да го локализираат пожарот и да спречат негово понатамошно ширење. Сепак, силниот ветер значително ја отежнува интервенцијата и придонесува пламените јазици брзо да се шират низ зафатеното подрачје.
Засега нема информации за загрозени објекти или повредени лица, но надлежните внимателно ја следат состојбата.
Пожарот е прв поголем ваков случај во регионот ова лето, а причините за неговото избувнување засега не се познати.
Службите апелираат до граѓаните да бидат внимателни и да избегнуваат активности кои можат да предизвикаат пожар, особено во услови на високи температури и засилен ветер.
