Саудиска Арабија забрзано го гради облакодерот кој треба да ја преземе титулата највисока зграда во светот. Кулата JEC, позната и како Jeddah Tower, според објавените информации веќе достигнала висина од околу 430 метри, а конечната цел е да ја надмине неверојатната граница од еден километар.
Гигантскиот облакодер се издигнува во пристанишниот град Џеда, а кога ќе биде завршен треба убедливо да го надмине сегашниот светски рекордер – Бурџ Калифа во Дубаи, висок 828 метри.
Зад архитектонското решение стојат Адриан Смит и Гордон Гил, а кулата треба да има најмалку 157 ката.
Според саудискиот принц Ал Валид бин Талал Ал Сауд, чија компанија Kingdom Holding учествува во развојот на проектот, изградбата веќе стигнала до 107. кат.
Хотел, луксузни станови и поглед од неверојатна височина
Jeddah Tower нема да биде само рекордер по висина. Во долните делови се планирани комерцијални содржини, додека повисоко ќе има луксузен хотел со околу 200 соби.
На горните катови се предвидени сервисирани апартмани, луксузни резиденции, небесно лоби и платформи за набљудување.
Колку становите ќе бидат поблиску до врвот, толку ќе бидат поголеми и полуксузни.
Инженерски предизвик без преседан
Изградбата на објект висок околу еден километар носи огромни инженерски предизвици. Еден од најголемите проблеми е влијанието на силните ветрови на екстремни височини и контролирањето на движењето на целата конструкција.
Поради тоа, инженерите користеле напредни компјутерски модели и тестирања во аеротунели за да создадат конструкција која истовремено ќе биде стабилна, безбедна и изводлива за изградба.
Доколку проектот биде реализиран според планот, Jeddah Tower ќе стане првата зграда во историјата што ќе ја пробие границата од еден километар височина.
Завршувањето на мегаобјектот е планирано за 2028 година, по што Бурџ Калифа би требало да ја загуби титулата што ја држи повеќе од една и пол деценија.
