По повод Светската недела на доењето, Министерството за здравство потсети дека мајчиното млеко е најприродниот и најбезбедниот начин на исхрана на новороденчињата и доенчињата.
Годинашното одбележување се одржува под мотото „Доење за одржлив почеток во животот – да го зајакнеме тоа што функционира“, со акцент на значењето на доењето за здравиот раст и развој на децата.
Од Министерството посочуваат дека мајчиното млеко ги содржи сите потребни хранливи материи за правилен развој, го зајакнува имунолошкиот систем и го намалува ризикот од бројни заболувања, при што придобивки имаат и мајката и детето.
Согласно препораките на Комитетот за доење, Светската здравствена организација (СЗО) и УНИЦЕФ, се препорачува исклучиво доење во првите шест месеци од животот, а потоа продолжување со доење заедно со соодветна дополнителна исхрана до две години или подолго, во зависност од потребите на детето и желбата на мајката.
Министерството за здравство истакнува дека останува посветено на унапредување на политиките за поддршка на доењето преку јакнење на капацитетите на здравствените установи, едукација на здравствените работници и обезбедување континуирана поддршка за бремените жени, мајките и нивните семејства.
Воедно, Министерството упати повик до здравствените работници, институциите, работодавачите, семејствата и целата заедница активно да придонесат во создавање услови што ќе им овозможат на мајките успешно да дојат, оценувајќи дека тоа претставува важна инвестиција во здравјето на сегашните и идните генерации.
