Европскиот парламент донесе историски предлог-закон што поставува први минимални стандарди за благосостојба на кучињата и мачките во целата Европска унија. Целта е да се стави крај на нелегалната трговија, неодговорното одгледување и суровите практики врз домашните миленици.
Со законот се воведува:
- задолжително микрочипирање и регистрација на сите кучиња и мачки
- забрана за продажба во продавници за миленици
- задолжителна регистрација и за увезените животни, дури и за некомерцијални цели
- строги услови за одгледување – забрана за инцестуозно парење (родител-дете, баба/дедо-внук, брат-сестра и слично)
- забрана за осакатување, како што е сечење уши и опаш, освен при медицинска потреба
- забрана за користење електро-огрлици, давилици и било каква опрема што предизвикува болка
- ограничување за учество на осакатени или генетски деформирани животни на изложби и натпревари
Пратениците бараат и сите држави да воспостават национални бази на податоци за следење на микрочипирани животни, а Европската комисија ќе управува со централна европска база.
Според податоци, трговијата со кучиња и мачки во ЕУ изнесува 1,3 милијарди евра годишно, а 60% од сопствениците купуваат животни преку интернет – често од нелегални одгледувачи или преку злоупотреба на регулативите.
Предлогот доби масовна поддршка во парламентот – 457 гласови „за“, 17 „против“ и 86 „воздржани“. Сега следат преговори со Советот на ЕУ за конечната верзија на законот.
Овој потег се смета за значаен чекор кон заштита на животните, но и удар врз профитабилниот, но често суров и неетички пазар на домашни миленици.
