Данската премиерка Метe Фредериксен најави дека владата подготвува закон со кој ќе се забрани користењето на социјалните мрежи за деца под 15 години. Оваа драстична мерка, според неа, е неопходна за да се заштитат децата од зависност, анксиозност и губење на вистинското детство.
„Телефоните им го крадат детството. Наместо игра и дружење, децата се заробени во виртуелен свет кој им ја уништува самодовербата“, изјави Фредериксен.
Планирано е платформите како Instagram, TikTok и Snapchat да бидат обврзани со посебни ограничувања и верификација на возраста. Родителите во Данска ја поздравија иницијативата, додека дел од експертите предупредуваат дека спроведувањето ќе биде голем предизвик.
Оваа одлука може да стане пример и за други европски земји кои веќе размислуваат за слични чекори за заштита на младите од негативното влијание на дигиталниот свет.
