Европскиот дисконтен малопродажен синџир Pepco официјално најави дека ќе ги отвори првите продавници во Македонија во средината на 2026 година, почнувајќи со Скопје. Со тоа, земјава ќе стане 19-та европска држава каде што овој познат бренд ќе биде присутен.
„Македонскиот пазар одамна е на нашата мапа. По успешното проширување во регионот, со задоволство потврдуваме дека Македонија ќе биде нашата деветнаесетта европска земја,“ изјави Марчин Станко, извршен директор за Централна и Источна Европа во Pepco.
Pepco е познат по понудата на достапна облека за деца и жени, како и производи за домот, декор и кујнски артикли, по прифатливи цени. Компанијата има повеќе од 4.000 продавници во 18 држави и месечно ја посетуваат над 30 милиони купувачи.
Продавниците во Македонија ќе бидат со просечна површина од 500 квадратни метри и ќе се наоѓаат во трговски центри, шопинг паркови и на фреквентни локации низ градовите.
Со влезот на македонскиот пазар, Pepco ќе создаде и нови работни места, особено за лица со искуство во малопродажбата кои сакаат да бидат дел од динамична меѓународна компанија со современи стандарди и работна култура.
