Најновите долгорочни анализи за претстојната зима 2025/2026 внесуваат загриженост меѓу метеоролозите и јавноста, откако „Severe Weather Europe“ објави проценка која укажува на можна екстремно студена и снежна сезона во големи делови од северната хемисфера.
Се работи за аналогна прогноза, метод базиран на споредување на моменталната глобална атмосферска состојба со слични сценарија од минатото. Истражувачите утврдиле дека оваа година покажува големи сличности со неколку од најстудените зими што досега ги паметиме.
Клучниот сигнал: Ла Ниња повторно се активира
Еден од главните показатели е состојбата на ENSO (El Niño – Southern Oscillation) во Тихиот Океан. Според последните мерења, се очекува развивање на Ла Ниња, климатски феномен познат по влијанието врз појавата на екстремно студени бранови и обилен снег, особено во Северна Америка, но и во некои делови од Европа.
Паралелно, потоплите води во Северниот Пацифик може да придонесат за поголема снежна активност на повисоки надморски височини и северни региони во Европа, додека други области може да се соочат со нестабилни и студени временски прилики.
Сибирската снежна покривка го алармира научниот свет
Дополнителна загриженост предизвикуваат најновите сателитски анализи за снежната покривка над Сибир во октомври, која е значително поголема од просекот за овој период. Оваа појава е често поврзана со слабеење на поларниот вртлог, што може да резултира со навлегување на студен воздух во пониските географски широчини.
Таквите услови ја зголемуваат веројатноста за екстремно ниски температури и снежни бури во источниот и северниот дел на САД, како и во централна и источна Европа.
ECMWF: Сите показатели водат кон „ретро“ зима
Најновите прогнози од Европскиот центар за среднорочни временски предвидувања (ECMWF), објавени за октомври 2025 година, го потврдуваат сценариото со рано и масовно формирање на снежна покривка во Сибир – уште еден сигнал кој упатува на поголема шанса за „старомодна“, долга и студена зима во многу региони од северната хемисфера.
