Европското јавно обвинителство (ЕЈО) официјално ги обвини двајца поранешни грчки министри за вмешаност во масовна шема на измама со европски земјоделски субвенции, вредна стотици милиони евра.
Според соопштението од обвинителството, двајцата поранешни министри, кои го предводеле ресорот за рурален развој и храна, се осомничени дека помогнале и поттикнале злоупотреба на ЕУ-средства за фиктивни пасишта и земјоделски активности кои никогаш не биле извршени.
Според неофицијални информации од грчки и европски извори, станува збор за Макис Воридис (министер за земјоделство 2021–2023, актуелен министер за миграција) и Лефтерис Авгенакис (министер за земјоделство 2023–2024, актуелен пратеник).
Милионската измама траела со години и се одвивала преку државната агенција за земјоделски субвенции ОПЕКЕПЕ, која не барала доказ за сопственост на пасиштата пред да ги исплати парите. Европски граѓани, најчесто од Крит, аплицирале за средства со лажни податоци, додека вистинските земјоделци останувале без финансиска поддршка.
ЕЈО истакна дека неговата работа била сериозно попречена од недостигот на надлежност за гонење членови на грчката влада – надлежност која, според грчкиот закон, ја има само парламентот.
Во знак на протест, ЕЈО го испрати случајот до парламентот и јавно го осуди ограничениот капацитет за борба против корупција на високо ниво. Главната обвинителка Лаура Ковеси најави дека истрагата ќе продолжи и покрај „нападите и заплашувањата“ против нејзиниот персонал.
Во меѓувреме, Европската комисија веќе ја казни Грција со 400 милиони евра, а се очекуваат и нови санкции поради системски пропусти во контролата на европските пари.
