Нови потресни детали се појавуваат за семејната трагедија во Велико Градиште во Србија, во која животот го загубија три лица, а уште две беа повредени.
Меѓу жртвите се пожарникарот Саша Ч. и неговата 19-годишна ќерка Јована Ч., кои биле убиени во семејната куќа.
Според информациите што ги пренесуваат српските медиуми, Б.К., кој бил полициски службеник, најпрво пукал кон својата сестра Анита Ч., по што се упатил кон куќата во која таа живеела со семејството.
Таму, според досегашните информации, смртно ги застрелал својот зет Саша и 19-годишната Јована. Во нападот била повредена и мајката на Саша, Светлана Ч. По злосторството, Б.К. си го одзел животот.
Анита и Светлана биле повредени, а надлежните продолжуваат да ги утврдуваат сите околности околу нападот.
Имотен спор како можен мотив
Како една од верзиите за мотивот се истражуваат нарушените семејни односи и долгогодишен имотен спор.
Српски „Блиц“, повикувајќи се на неофицијални информации, објави дека таткото на Б.К. наводно го исклучил синот од наследството со тестамент. Според истите информации, документ поврзан со имотот бил пронајден и на местото на злосторството.
Сепак, овие детали за можниот мотив засега не се официјално потврдени и истрагата треба да покаже што точно му претходело на нападот.
Телата на починатите се испратени на обдукција, а на местото бил извршен увид. Во случајот се вклучени и обвинители од Вишото јавно обвинителство во Пожаревац.
Полицијата и обвинителството продолжуваат со истрагата за целосно расветлување на трагедијата и утврдување на точниот мотив.
