Во морето од трагични приказни што пристигнуваат од Непал, една брза одлука на директор на училиште спасила стотици животи.
Раџендра Давади, директор на средното училиште „Трибхуван Тришули“ во Нувакот, наредил итна евакуација на околу 900 ученици непосредно пред разорната поплава да стигне до областа.
Давади за Би-Би-Си раскажал дека во рок од само неколку минути добил четири предупредувачки повици од различни лица. Меѓу информациите што ги добил било и предупредувањето дека надојдената вода веќе ја погодила населбата Бетравати, по што решил дека повеќе нема време за чекање.
„Решив дека не можам повеќе да одложувам. Дури и да не дојдеше поплавата, ќе изгубевме само еден ден настава“, објаснил директорот.
Учениците веднаш биле упатени кон повисоко и побезбедно место.
Додека траела евакуацијата, Давади веќе можел да види како надојдената вода зафаќа станбена зграда на околу 100 метри од реката.
Колку малку време имале покажуваат неговите зборови дека само десетина минути доцнење можело да има катастрофални последици.
„Да ја донесевме одлуката 10 минути подоцна, никој од нас, вклучително и учениците и мене, немаше да може да разговара со вас денес“, изјавил тој.
Една од ученичките раскажала дека таа и нејзините пријатели се спасиле буквално во последните моменти, додека пред нивните очи водата го однесувала блискиот пазар.
Училиштето со кое раководи Давади има повеќе од 1.600 ученици, а во моментот на опасност околу 900 од нив биле евакуирани.
Во катастрофалните поплави во Непал, според последните бројки наведени од локалните власти, загинале најмалку 794 лица, а повеќе од 2.500 се водат како исчезнати. Во Тибет се пријавени уште 16 загинати и 546 исчезнати.
Додека потрагата по исчезнатите продолжува, приказната за директорот од Нувакот стана пример колку навременото предупредување и одлуката за евакуација можат да бидат пресудни во моментите кога секоја минута значи живот.
