Директорот на ЦИА, Џон Ретклиф, за време на својата тајна посета на Москва на 25 август, предложил организирање трилатерална средба меѓу американскиот претседател Доналд Трамп, рускиот претседател Владимир Путин и украинскиот претседател Володимир Зеленски, објави „Аксиос“, повикувајќи се на неименувани извори.
Според информациите на американскиот портал, една од задачите на Ретклиф била да утврди дали високите претставници на руските разузнавачки служби би можеле да помогнат Путин да биде убеден да се согласи на обновување на преговорите со Украина, со посредство на САД.
Идејата за средба на тројцата претседатели не е нова. Администрацијата на Трамп и претходно ја разгледувала оваа можност, а Зеленски изразил подготвеност да учествува. Од Москва, сепак, досега немало согласност за таков формат.
Средби со врвот на руските служби
За време на престојот во Москва, Ретклиф се сретнал со директорот на руската Служба за надворешно разузнавање, Сергеј Наришкин, како и со директорот на Федералната служба за безбедност, Александар Бортников.
Посетата претставува и прво директно вклучување на директорот на ЦИА во дипломатските напори на актуелната американска администрација за придвижување на руско-украинските преговори.
Разговорите меѓу Москва и Киев, кои се одвиваа со американско посредство, во меѓувреме влегоа во застој. Претставниците на Белата куќа, Стив Виткоф и Џаред Кушнер, во изминатите месеци одржуваа одделни разговори со руски и украински претставници, но засега без позначителен напредок.
Информациите за конкретниот предлог на Ретклиф се засноваат на неименувани извори цитирани од „Аксиос“, а засега нема официјална потврда дека Путин прифатил трилатерална средба.
