Музичката јавност е завиена во црно по веста за смртта на хрватскиот музичар Далибор Брун, кој почина на 77-годишна возраст. Информацијата за неговото заминување ја објави хрватскиот медиум Jutarnji list, по што следеа бројни реакции од колеги, обожаватели и љубители на музиката ширум регионот.
Далибор Брун зад себе остави исклучително богата и долготрајна музичка кариера која траеше повеќе од четири децении. Во текот на својот живот сними повеќе од 50 музички изданија, настапуваше на сите релевантни музички фестивали и беше препознатливо телевизиско лице, имајќи и сопствена ТВ-емисија. Неговиот последен студиски албум, насловен „Нема завала“, беше објавен во 2004 година под издавачката куќа Croatia Records.
Брун важеше за еден од најпопуларните поп-пејачи во 70-тите и 80-тите години, период во кој неговите песни беа редовно присутни на радио и телевизиските програми. Својата официјална дискографска приказна ја започна во 1973 година со издавањето на ЛП-албумот „Вољеној“ за тогашниот „Југотон“. Во текот на 70-тите години следеа уште неколку успешни албуми објавени за истата издавачка куќа, со што тој го зацврсти својот статус како едно од најпрепознатливите имиња на тогашната музичка сцена.
Со своето творештво, Далибор Брун остави неизбришлива трага во историјата на поп-музиката, а неговите песни и понатаму ќе живеат како сведоштво за една златна ера.
