Приштина денеска беше потресена од вест која ја вознемири јавноста, откако во населбата Ветерник беше пронајдено безживотно тело на маж во автомобил. Станува збор за Хекуран Хоџа, бизнисмен од Ѓаковица, кој на последните избори одржани на 28 декември се појави како кандидат за пратеник на листата на Алијансата за иднината на Косово (АБК), партија предводена од Рамуш Харадинај.
Според информациите што ги пренесуваат локалните медиуми, случајот бил пријавен околу 15 часот, кога граѓани забележале лице без знаци на живот во паркирано возило. На местото веднаш пристигнала медицинска екипа која ја констатирала смртта.
Портпаролот на Косовската полиција за регионот на Приштина, Енис Плана, потврди дека полицијата заедно со државниот обвинител веднаш започнале истрага. Надлежните институции спроведуваат детални истражни и форензички постапки со цел да се утврди точната причина за смртта и да се расветлат сите околности поврзани со овој случај.
Засега не се соопштуваат дополнителни детали, а јавноста со нетрпение очекува официјални информации кои ќе дадат одговор дали станува збор за несреќен случај, здравствен проблем или нешто многу посериозно.
