Вистинска воздушна мистерија се одвива над северна Колумбија, откако мал патнички авион со 15 лица одеднаш исчезнал од радарите. Во леталото се наоѓале 13 патници и двајца членови на екипажот, а инцидентот се случил во близина на границата меѓу Колумбија и Венецуела.
Според првичните информации, авионот полетал од пограничниот град Кукута и се упатил кон Окања, каде што требало да слета околу пладне по локално време. Меѓутоа, непосредно пред планираното слетување, комуникацијата со контролната кула нагло била прекината, по што леталото исчезнало од системите за следење.
Авиокомпанијата потврди дека летот бил редовен и дека немало пријавени технички проблеми пред полетувањето. Воздухопловните власти реагирале веднаш, активирајќи ги сите безбедносни, алармни и спасувачки процедури. Во потрагата се вклучени повеќе тимови кои го пребаруваат подрачјето каде што последен пат бил забележан авионот.
Засега нема информации за судбината на патниците и екипажот, а причините за прекинот на комуникацијата остануваат непознати. Јавноста со загриженост ги следи случувањата, додека надлежните служби интензивно работат на расветлување на овој вознемирувачки настан.
