По откривањето на жариштата на вирусот Нипа во Индија, неколку азиски земји повторно воведоа строги санитарни контроли за патниците на аеродромите. Тајланд, Непал и Тајван ги засилија проверките, враќајќи ги процедурите слични на оние од времето на пандемијата со коронавирусот, известува „Индипендент“.
Во Тајланд, Министерството за јавно здравје спроведува темелни проверки на патниците што пристигнуваат од Западен Бенгал, на главните аеродроми како Суварнабхуми, Дон Муанг и Пукет. Патниците се проверуваат за температура и симптоми на Нипа, а добиваат и посебни инструкции за постапување во случај на зараза.
Слични мерки се воведени во Непал на аеродромот Трибхуван во Катманду и на копнените гранични премини, додека Тајван ги засили прегледите на патниците од погодените региони. Локалните медиуми предупредуваат дека вирусот најчесто се пренесува преку близок контакт со заразени лица.
Во Индија, вирусот е откриен кај пет медицински работници во болницата Бурдван во Бардаман, близу границата со Бангладеш. Повеќе од 100 лица кои биле во контакт со заразените се ставени во карантин.
Нипа е многу опасен вирус со висок морталитет – од 40 до 75% од заразените починале во претходните епидемии. Болеста се јавува во регионите наречени „Појас Нипа“ – Малезија, Сингапур, Бангладеш и Индија. Светската здравствена организација го класифицира како патоген со висок епидемиски потенцијал, предупредувајќи на сериозен ризик за јавното здравје во регионот.
Оваа закана ја потсетува светската јавност дека вниманието на санитарните мерки не смее да стивне, особено кога се работи за смртоносни вируси како Нипа.
