Нови вознемирувачки информации се појавија во случајот со смртта на 32-годишниот Кристијан Јосип Периш во психијатриската болница „Свети Иван“ во Загреб.
Сведок тврди дека на снимките од постапувањето со Периш препознал медицински техничар кого претходно го пријавил за физичко насилство врз друг пациент во истата здравствена установа.
Информацијата ја потврди адвокатот Иван Врдолјак, кој го застапува сведокот.
Според адвокатот, инцидентот се случил во декември минатата година, околу еден часот по полноќ, кога медицински техничар наводно нападнал пациент кој бил врзан за кревет.
„Нападот вклучувал повеќекратни удари со тупаници, држење за грлото и закани со смрт доколку некому каже што се случило“, изјавил Врдолјак.
Тој тврди дека медицинскиот техничар се вратил по половина час и продолжил со тепањето, кое траело најмалку пет минути.
Сведокот следното утро го пријавил настанот за време на лекарската визита, но според неговото тврдење, никој не реагирал.
Поради тоа, на 26 јануари 2026 година поднел кривична пријава против тогаш непознат медицински техничар.
Минатата недела, откако ги видел снимките од случајот Периш, сведокот тврди дека го препознал истото лице.
Адвокатот изразил загриженост затоа што, според неговите информации, пријавата со месеци останала без разрешница.
Дополнително, тој навел дека претходно нападнатиот пациент имал здравствена состојба поради која физичкиот допир му предизвикувал силна непријатност, а вработените наводно намерно го вознемирувале.
Во меѓувреме, Хрватското здружение за заштита на правата на пациентите побара поширока проверка на работењето на психијатриските установи во земјата.
Хрватскиот премиер Андреј Пленковиќ изјавил дека надлежните институции ќе ги испитаат сите сомнежи за незаконско постапување, но не гледа потреба од оставка на министерката за здравство.
Во врска со смртта на Кристијан Периш, четворица медицински техничари се осомничени за тешко убиство и се наоѓаат во истражен притвор.
Наводите за претходното насилство и идентитетот на медицинскиот техничар допрва треба да бидат утврдени во надлежна постапка.
