Во Србија продолжува исплатата на осигурените депозити на клиентите на Алта банка, а за помалку од два дена веќе се исплатени повеќе од седум проценти од средствата наменети за оваа постапка.
Како што соопшти Банка Поштанска штедионица, исплатата се врши со средства обезбедени од Агенцијата за осигурување депозити.
Според најновите податоци, преку готовински исплати и банкарски трансфери досега се реализирани 7,27 проценти од средствата предвидени за исплата во српски динари и 7,74 проценти од средствата наменети за исплата во евра.
Голем интерес има и за закажување термини за подигнување на парите.
Преку интернет-порталот на Поштанска штедионица досега се закажани вкупно 17.789 термини.
Од банката нагласуваат дека исплатата се врши исклучиво со претходно закажан термин, со цел да се избегнат големи редици и да се овозможи побрза услуга.
Клиентите можат да закажат термин преку официјалната веб-страница www.posted.co.rs.
Оние што немаат можност да користат интернет можат да закажат термин телефонски, преку контакт-центарот на бројот 011 2020 292, или лично во некоја од експозитурите на банката.
Од Поштанска штедионица апелираат граѓаните да пристигнуваат во точно закажаното време и претходно да се информираат за потребната документација.
Целта е исплатата или преносот на средствата да се извршат што побрзо и без непотребно чекање.
