Случај на врсничко сексуално насилство во основно училиште во Србија повторно ја вознемири јавноста, откако родителите на малолетен ученик јавно проговорија за она што нивниот син го преживеал и побараа институциите целосно да ја утврдат вистината.
Инцидентот се случил на 11 јуни во Основното училиште „Татомир Анѓелиќ“ во Мрчајевци, во близина на Чачак.
Според родителите, нивниот 14-годишен син бил сексуално нападнат од други ученици во просториите на училиштето. Тие велат дека детето по настанот претрпело сериозна траума и дека практично целиот летен распуст го поминало на лекарски прегледи и разговори со психолози и психијатри.
„38 ноќи не спиевме поради него. Другите деца беа на распуст, а тој беше во болница, кај психијатар, кај психолог и така му помина распустот. Веруваме дека правдата ќе излезе на виделина“, изјавила неговата мајка Ана Марковиќ.
Семејството не е задоволно од досегашниот одговор на системот и бара детално да се преиспита постапувањето на сите институции вклучени во случајот.
Во меѓувреме, родители и жители собраа илјадници потписи со кои побараа целосно утврдување на околностите и евентуалната одговорност на оние кои направиле пропусти.
Самиот ученик јавно зборувал за случувањата, наведувајќи дека бил нападнат во училишен кабинет и дека во инцидентот учествувале повеќе негови врсници. Поради возраста на детето и чувствителноста на случајот, деталите од неговото сведоштво не ги пренесуваме.
Од друга страна, Вишото јавно обвинителство во Чачак соопшти дека по лекарскиот преглед, разговорите со учениците, вработените во училиштето и собирањето други информации, не утврдило дека станувало збор за силување. Според официјалната квалификација на обвинителството, малолетникот претрпел полово вознемирување.
Случајот, сепак, продолжи да предизвикува силни реакции во јавноста, а семејството останува на ставот дека мора целосно да се утврди што се случило и дали сите надлежни постапиле правилно.
На 2 септември во училиштето била одржана и меѓусекторска конференција со претставници на институциите, училиштето, родителите и потписниците на петицијата. Во меѓувреме, училиштето соопшти дека учениците кои учествувале во насилството ќе ја следат наставата на далечина додека не се создадат услови за нивно враќање, додека ученикот кој го претрпел насилството продолжува со редовна настава.
Родителите велат дека нивната главна цел е нивниот син повторно да се чувствува безбедно и случајот да биде расчистен до крај, за нешто слично никогаш повеќе да не му се случи на друго дете.
