Трговската војна меѓу Соединетите Американски Држави и Канада дополнително се заострува, откако американскиот претседател Доналд Трамп потпиша нови мерки со кои се забранува увозот на повеќе категории канадски производи.
Новите ограничувања опфаќаат голем број алкохолни пијалаци, одредени млечни производи, мотоцикли и мопеди, а треба да стапат во сила на 29 септември.
Меѓу производите опфатени со забраната се различни видови пиво и вино, виски, вотка, рум, бренди и други алкохолни пијалаци, како и одредени производи од сурутка и други категории поврзани со млечната индустрија.
Белата куќа ги оправдува мерките со, како што наведува, долгогодишната дискриминација на американските производители и нееднаквиот пристап до канадскиот пазар.
Новиот потег доаѓа само неколку часа откако стапија во сила канадските контрацарини за американски производи во вредност од околу 20 милијарди американски долари.
Канада претходно воведе дополнителни давачки од 15 до 50 проценти за американски производи, како одговор на царините што Вашингтон ги воведе во август.
Трамп удри и по канадските производи во државните набавки
Американскиот претседател истовремено отвори уште еден фронт во спорот со Отава.
Трамп нареди канадските производи да бидат отстранети од системот преку кој американската федерална влада склучува големи долгорочни договори за јавни набавки.
Според него, Канада не им овозможува еднаков пристап на американските компании до сопствениот пазар и поради тоа повеќе нема да има ист третман во САД.
Ограничувањата, порача Трамп, ќе останат додека Канада не обезбеди „целосен и фер реципроцитет“ за американските компании и земјоделци.
Канада најавува дека нема да попушти
Канадскиот министер задолжен за трговските односи со САД, Доминик Леблан, потврди дека Отава ги анализира најновите американски мерки.
Тој порача дека заштитата на канадските работници, земјоделци, семејства и компании останува приоритет на владата.
Леблан разговарал и со американскиот трговски претставник Џејмисон Грир, а контактите меѓу двете страни треба да продолжат во обид да се пронајде излез од сè подлабокиот спор.
Но засега нема знаци дека Вашингтон и Отава се блиску до компромис.
Напротив, по канадските контрацарини следуваа американски забрани за увоз, проширување на списокот со производи кои ќе плаќаат царина од 50 проценти и ограничување на пристапот на канадските компании до федералните јавни набавки.
Со тоа, еден од најблиските трговски односи во светот влегува во период на сè поголема неизвесност, а последиците од ескалацијата може да ги почувствуваат и компаниите и потрошувачите од двете страни на границата.
