Седумнаесетгодишна девојка од Богданци е втората жртва која била пронајдена во опожарениот автомобил кај местото „Ичева чешма“, дознава неофицијално „Скопје1“. Покрај возилото претходно беше пронајдено безживотното тело на 21-годишниот Виктор Г. од Богданци, за кого медиумот наведува дека бил момче на девојката.
Случајот добива дополнителна тежина по информациите дека малолетничката претходно го пријавила 21-годишникот за физичко насилство, а на блиски пријатели им раскажувала и дека добивала закани.
Според сознанијата објавени од „Скопје1“, девојката пријавила дека била физички нападната во домот на момчето. Полицијата постапила по пријавата, го привела 21-годишникот и го известила надлежното обвинителство.
Од Министерството за внатрешни работи потврдиле дека на 30 септември 2026 година, околу 21 часот, бил пријавен физички напад врз 17-годишна девојка од страна на нејзиното 21-годишно момче во неговиот дом.
„Полициски службеници лишија од слобода 21-годишен жител на Богданци. Според пријавеното, тој на 30.09.2026 околу 21:00 часот во неговиот дом физички ја нападнал неговата 17-годишна девојка. За настанот е известен јавен обвинител од Основното јавно обвинителство Гевгелија, а по документирање на случајот ќе биде поднесена соодветна пријава“, соопштиле од МВР.
Дополнително, според информациите до кои дошла редакцијата на „Скопје1“, девојката разговарала со блиски луѓе за нападите и заканите што, според нејзините тврдења, ги трпела.
Во пораки до кои дошол медиумот, таа на пријателите им раскажувала дека добивала закани од момчето. Во една од комуникациите, според нејзините наводи, споменала и дека тој во одредена пригода се обидел да ја нападне со нож, по што успеала да избега низ прозорец.
Овие тврдења засега не се независно потврдени од истражните органи, ниту е познато дали во целост биле пријавени кај надлежните институции.
Двете тела беа пронајдени на 3 ноември
Потсетуваме дека случајот бил пријавен на 3 ноември 2026 година, во 18:40 часот, кога жител на Богданци известил дека на местото „Ичева чешма“, во Горно Село, забележал опожарено паркирано возило и безживотно тело во негова близина.
Полициските службеници кои пристигнале на локацијата го пронашле 21-годишниот Виктор Г., кој не давал знаци на живот. Екипа на Итната медицинска помош при Општата болница во Гевгелија ја констатирала неговата смрт.
Откако пожарникарите го локализирале пожарот, во внатрешноста на автомобилот било откриено уште едно опожарено тело.
По наредба на јавен обвинител од Основното јавно обвинителство Гевгелија, телата биле предадени на обдукција со цел да се утврдат идентитетот на второто лице и причините за смртта.
Иако изворите на „Скопје1“ наведуваат дека второто лице е 17-годишната девојка, нејзиниот идентитет сè уште треба официјално да биде потврден од надлежните институции.
Засега не е утврдено како избувнал пожарот, што ја предизвикало смртта на двете лица и дали претходно пријавеното насилство има каква било поврзаност со настанот.
Случајот отвора и прашања за постапувањето на институциите по претходната пријава за насилство. Особено се поставува прашањето дали била направена процена на ризикот и дали биле преземени соодветни мерки за заштита на малолетничката. МВР во своето известување потврдило дека за претходниот случај бил известен јавен обвинител и дека полицијата постапувала по настанот.
Истрагата треба да ги утврди сите околности, вклучително и евентуалната поврзаност меѓу претходната пријава и смртта на двете лица.
ИЗВОР: Скопје1.мк
