Морничаво откритие е направено во близина на Подгоречкото Езеро, во атарот на селото Лабуништа, недалеку од македонско-албанската граница, каде што бил пронајден човечки череп. Случајот го потврди СВР Охрид, а надлежните институции веќе работат на негово целосно расветлување.
Според информациите од полицијата, човечките останки биле забележани на 25 јули од полициски службеници од Полициската станица за граничен надзор Лабуништа, кои веднаш постапиле согласно законските процедури.
При увидот, покрај човечкиот череп биле пронајдени и други предмети, кои би можеле да бидат значајни за истрагата. Засега не е соопштено за какви предмети станува збор, а тие ќе бидат предмет на дополнителни анализи во рамки на истражната постапка.
По извршениот увид, во координација со надлежните институции, започнати се активности за утврдување на идентитетот на лицето, како и за расветлување на сите околности поврзани со случајот. Истражните органи ќе треба да утврдат колку долго останките се наоѓале на тоа место и дали постојат елементи што укажуваат на евентуално кривично дело.
Во овој момент, од полицијата не откриваат дополнителни информации за околностите под кои бил пронајден човечкиот череп. Истрагата продолжува, а повеќе детали се очекуваат по завршувањето на вештачењата и официјалните проверки што ги спроведуваат надлежните служби.
