Силен земјотрес со јачина од 6,1 степени според Рихтер ја погоди западна Турција во недела навечер, предизвикувајќи паника и материјална штета во повеќе градови. Според државната агенција AFAD, епицентарот бил во округот Синдирги, во покраината Баликешир, на длабочина од 11 километри. Потресот бил почувствуван на широко подрачје – од Баликешир и Измир, до Истанбул и Текирдаг.
Министерот за внатрешни работи Али Јерликаја потврди дека неколку згради се урнале, вклучувајќи една во Синдирги каде што две лица се спасени од урнатините, додека потрагата по уште две продолжува.
Драматично видео од погодената област, кое се појави на платформата X, ја прикажува реакцијата на жена која за време на потресот инстинктивно се втурнува под цврста маса. Само неколку секунди подоцна, плакарот во просторијата се урива и предмети почнуваат да паѓаат – нејзиниот брз потег ѝ го спаси животот.
Снимката стана вирална, потсетувајќи на советите на експертите дека за време на земјотрес најсигурно е да се побара засолниште под стабилен мебел и да се заштити главата.
Турскиот претседател Реџеп Таип Ердоган испрати порака за солидарност и поддршка до погодените, а министерот за здравство Кемал Мемисоглу потврди дека четири лица се хоспитализирани, но ниту едно не е во критична состојба.
